Jo ke mehfil meN

Jo ke mehfil meN burdubaar hue,
Unke maDDah beshumaar hue,

BadgumaanoN se nibhaaeN naaseh
ham To is qaum se bezaar hue,

BilyaqeeN wo shajar jhukega hi
Jiski shaakhoN meN bargo baar hue,

Gule ikhlaas ko kuchla jisne
Ooski raahoN meN saDa Khaar hue,

Pehle ehsaase kamtari se mile,
phir hasad ke wo dostdaar hue,

Dost ban kar tujhe gumraah karen,
AasteenoN ke wo to maar hue,

Ham asaa khair ka liye hardam,
Neele harja se dekh paar hue,

Kashife har naqaab hai ye ghazal
Rehbare haq mere ash-aar hue,

Haq nawaaee hay shewae Sadiq
Ham to har sher par nissar hue,

Tu jo sachchi hai

Tu jo sachchi hai larazti kyun hai
aye zaban bol de darti kyun hai

koi sunta nahin shikwa kaisa
ye ibaarat tujhe jachti kyun hai

qalb men khowfe khuda hai tere
phir zuban sach se jhijhakti kyun hai

shewa haqgoi hai jiska duniya
usko naadan samajhti kyun hai

kya zamane ka khowf lahaq hai
chaal men teri ye susti kyun hai

tu to SADIQ hai ye ghutna kaisa
ye thakan si tujhe lagti kyun hai

Teri haakim se agar

Teri haakim se agar yaari hai
Jaan lay(Samajh lay, soch lay) sher ki sawari hay

Surkhiyan zard nazar aati hain
badgumaanon ki ye beemaari hay

Besamar tan ke khade hain ashjaar
baasamar hi main inkisaari hai

Usko har qowm kahegi apnaa
hilm hai jismain burdubaari hay

Neki dushman se! kathin hai, lekin
eik isi kaam main sardaari hai

Talkh Sadiq ki sadaaqat hay magar
uski talkhi main hi bedaari hay

ham se mat puchh

Ham se mat puchh ke kya dekha hai
unke jalwoN meN Khuda dekha hai

Na sune koi to chup ho jaana
ham ne is meN bhi maza dekha hai

do jahaN meN wo paagaya rutbay
jisko raazi ba razaa dekha hai

Khair ki baat jo karta hai yahaN
uska har zaKhm hara dekha hai

Asre haazir meN harek Sadiq ko
leke kishkol khaDa dekha hai

Imaan ke saath sabr

ImaaN ke saath sabr muqarrar ki tarah hae,
Yeh tan ke baraabar hae to woh sar ki tarah hae.

Be hisaab zar bhi agar hae tera bakHeel
SangrezoN ki maaninD hae kankar ki tarah hae

Tujh ko tameez'e baatil'o haq hae to bahut hae
Kooz'e meN yehi ilm samandar ki tarah hae

Aalim baraa'e naam hae gar be amal hae tu
Baar'e gHuroor'e ilm lad'e kHar ki tarah hae

NeeND oos gadaa ki rashk'e ru'asa hae keh jis'e
Pathhar ki zameeN reshmi bistar ki tarah hae

Zaahir meN shakist oos ki nazar aati ho lekin
Hur daur meN Saadiq hi muzaffar ki tarah hae

Shikwa'e tashna labi

Shikwa'e tashna labi kis se kar'e dil saaqi
Kaun munsif hae yahaN kaun hae aadil saaqi

Kaaba'e dil pay machi loot hae abraahoN ki
Sangreze hi rahe ub na ababil saaqi

Qism'e shukraana'e yezdaN hae shagoofta rehna
Qaid'e mausam se nikal gul ki tarah khil saaqi

Sohbat'e zaagh meN seekha yeh sabaq hae warna
Fitratan ma'soom wa kHoosh kHoo hae anaadil saaqi

Tujh ko Aazadi hae darkaar to Saadiq bun ja
Tegh'e haq goi se katTi hae salaasil saaqi